Монгол хэлнээс гадаад хэл, тэр дундаа англи хэл рүү орчуулж сурахыг эрмэлзэж буй нийт оюутан, суралцагч та бүхэндээ зориулж, орчуулга хийхэд анхаарвал зохих хэдэн зүйлийн талаар бичсэн эрдэм шинжилгээний өгүүллээ хураангуйлан энэхүү цуврал сурах бичигтээ орууллаа.

МУИС, ШУС, ХУС-ын Эрдмийн Зөвлөлөөр хэлэлцэж батлуулсан "Орчуулахад суралцах бичиг-ІІ" нэртэй сурах бичгийн дөрөвдүгээр хэвлэлийг тус сургуулийн Их Британи, Америк судлалын тэнхимийн “Гадаад хэлний орчуулга" хөтөлбөрийн “Англи хэлний аялал жуулчлалын орчуулга" хичээлийн үндсэн хэрэглэгдэхүүн болгож энэ удаад цахимаар хэвлэн гаргаж байна. Монгол орныхоо түүх соёл, зан заншил, ёс уламжлал, ахуй амьдрал, хувцас хийгээд хоолны соёл зэрэг олон гайхалтай өв соёлоороо өөрсдөө бахархаад зогсохгүй тэдгээрийг илүү танин мэдэж, англи хэлтэн хүмүүст тайлбарлан таниулах нь монгол хүн болж төрсний нэгэн хэрэг бүтэх юм. Тиймээс энэ чиглэлийн орчуулга хийх арга барилд суралцах нь уг хичээлийн зорилго бөгөөд хичээлийн агуулгад нийцүүлэн сонгосон бичвэрийг орчуулж, холбогдох бусад даалгаврыг "Сурах бичгийг ашиглах заавар"-ын дагуу хийж гүйцэтгэвэл зохилтой.