Монгол Улсад урьд өмнө гэр бүлийн асуудлыг түүх, угсаатны зүй, социологийн чиглэлээр судалж туурвисан бүтээл арвин ч хууль зүйн талаас тухайлан судалж нийтийн хүртээл болж буй анхны гэж хэлж болох ном нь “Монгол улсын гэр бүлийн эрх зүй” юм. Тус бүтээл нь нэг талаар сургалт-танин мэдэхүйнд, нөгөө талаар эрдэм шинжилгээ, судалгааны гүйлгээ, хэрэгцээнд ашиглагдах боломжтой.

Энэхүү бүтээлд гэр бүлийн эрх зүйн үндсэн асуудлын хүрээнд гарсан өөрчлөлт, гэр бүлийн дотоод асуудлыг гэр бүлийн гишүүд харилцан тохиролцож шийдвэрлэх, төрөөс гэр бүлийн тогтвортой байдлыг дэмжих, гэр бүлийн эрх зүйн хамгаалалтыг хэрэгжүүлэх, шүүхийн хэлбэр хэрэгжиж байгаа онцлогийг шүүхийн практик болон шийдвэрт үндэслэн гаргахыг зорьжээ. Мөн их дээд сургуулиудад гэр бүлийн эрх зүйн хичээлийг заахад сургалтын хэрэглэгдэхүүн болох үүднээс тухайн салбар эрх зүйн онолын үндсэн асуудлыг сэдэв тус бүрт тодорхойлж энэ хичээлийн хүрээнд олсон мэдлэгээ шалгах сорил, хяналтын асуултыг багтааж гэр бүлийн эрх зүйн асуудлыг судлах хүн бүрт зориулжээ.