Хууль зүйн шинжлэх ухааны доктор профессор, академич Т.Сэнгэдоржийн эрдмийн бүтээлийн лавламжийг хэвлүүлж байна. Т.Сэнгэдоржийн эрдэм шинжилгээний авьяас бүр оюутан байх цагаас нь эхлэн мэдэгдэж байсан юм. Эрхүүгийн Улсын Их Сургуулийн Хууль зүйн факультетад сурч байхдаа “Оюутны Эрдэм Шинжилгээний Нийгэмлэг”-т элсэж, 3-р курст ороод “Иркутский Университет” сонинд 1964 онд анхныхаа өгүүллийг хэвлүүлжээ. Дараа нь манай ард түмний эрх чөлөө, тусгаар тогтнолын бэлгэдэл болсон “Соёмбо” тэмдгийн асуудлыг судалж, нэрт эрдэмтэн Ц.Дамдинсүрэн, Б.Ринчен нарын энэ талаарх үзэл бодлыг харьцуулан үзэж, МУИС-ийн Нийгмийн Ухааны факультетын эрдэм шинжилгээний ээлжит бага хуралд” илтгэл тавьж, тэргүүн байранд шалгарч байв. Түүний “Соёмбо” нэртэй өгүүлэл) “Шинжлэх ухаан, амьдрал” (1966, №З) сэтгүүлд хэвлэгдсэн юм. Т.Сэнгэдоржийн эрдэм шинжилгээний болон багшлах ажилд өсөх ирээдүйтэй гэж таамаглан хуулийн салбарт мэргэжлийн багшаар авах саналыг МУИС-ийн захиргаанд тавьсныг ёсоор болгож сургууль төгсмөгцөө багш болж 40 шахам жил багшлах болон эрдэм шинжилгээний ажлыг тасралтгүй хийж иржээ.

Экологийн эрх зүйгээр экологийн харилцаа, түүний тодорхой төрлүүдийн эрх зүйн зохицуулалт, хууль зүйн хэм хэмжээг хэрэглэх, хэрэгжүүлэх, байгалийн нөөц баялгийг өмчлөх, эзэмших, ашиглах, хамгаалах талаархи төр, иргэн, аж ахуйн нэгж, байгууллагуудын эрх зүйн байдал, байгаль орчны салбар дахь төрийн удирдлага, хяналт, иргэдийн эрх үүрэг, олон нийтийн оролцоо, байгалийн нөөцийн улсын дансны эрх зүйн үндэс, газар, түүний хэвлий, ашигт малтмал, тусгай хамгаалалттай газар нутаг, ой, ус, амьтан, ургамал, агаар зэрэг байгалийн нөөц баялгийг эрх зүйн арга хэрэгслээр хамгаалах, экологийн харилцаанд илэрч буй зөрчил, түүнд хүлээлгэх хууль зүйн хариуцлага түүнчлэн олон улсын экологийн эрх зүйн үндсэн асуудлуудыг судлах юм.

Монголын төр байгаль орчныхоо нөөц баялгийг зохистой хэрэглэн, тэнцвэрт байдлыг хангах чиглэлээр олон улсын өмнө хүлээсэн үүргээ чанд биелүүлэхэд эрх зүйн арга хэрэгслийг үр нөлөөтэй ашиглах нь тулгамдсан зорилт болж байгааг харгалзан, “ Олон улсын экологийн эрх зүй” хэмээх энэхэн номыг уншигч олондоо толилуулж байгаа ба энэ нь бие даасан бүтээлийн хувьд манай орны хууль зүйн шинжлэх ухааны салбарт анхных юм. Уг номд Олон улсын экологийн эрх зүйн тулгуур ойлголтуудыг анх удаа нэгдмэл тогтолцоонд оруулан судалж, холбогдох баримт бичиг, хуульч эрдэмтдийн бүтээлүүдийг ашигласан болно.

Энэхүү эрдэм шинжилгээний бүтээлд Монгол Улсын Их Сургуулийн эрдэмтэн судлаачдын бичсэн хууль, эрх зүйн талаарх 8 өгүүллийг багтаасан байна.